يا ترى لسه فكراني ؟
انا الجذر اللي نبت من غيطانك شوق
انا الزهر اللي ورد على الجناين فوق
انا اللي بكيت وانا مولود على حالك
وقالوا اذنوا وصلوا في وذانه
يمكن ده جي من قبل لاوانه
بكيت من الفرحة وقلت اذنوا وصلوا
ما هو من زمان الرسل في الارض دي اتلموا
وانا بتولد شايف مريم وابنها عدوا
ويوسف الصديق وقبله كمان جده
بتنسم عبير الطهارة وابكي من الفرحة
انا مولود لكن لقيتك يا مصر عروسه
وواقفة بالطرحه
وكبرت في ترابك وبقى لازق على جسمي
ولو سمعت في يوم نشره تقول مصر
اقول ده جزء من اسمي
ونيلك يا قلب قلبي تملي كان رسمي
مش هاطالبك بثمن وقفة في التحرير
ولا ضريبة لاني سبب في التغيير
لكن انا عارف الحمل لسه كبير
حطي الحمل على كتفي بعزم شديد
وقولي لمين واقف على بابك
لسه ابني حارسني
ولو مات سايبلي وليد
ووقت ميلاده كان حالف انه يفديني
ولو يبقى علشاني شهيد
يا رب تكوني فاكراني
ما دهية ترجعي تاني وتبقي نسياني
يا بلدي يا كل احلامي
انا عشقك وانتِ كل وجداني
خلاص انسي احزانك
وانسي اللي كان اسرك
وكان عصرك وكان حبسك
مدام فكيت لقيودك
وبايديا كسرت الطوق
ناديني وخديني
في سهراية
وضميني على ضفافك
انا وانت وبس
ونيل الشوق
