هادا واحد مبوق سول صاحبو:فين تولدتي؟
قال ليه صاحبو: ف السبيطار
قال ليه المبوق: مالك أصاحبي كنتي مريض؟
واحد المكلخ سولوه: أشنو هو أهم أسباب الطلاق؟
فكر المكلخ شوية وقال ليهم: الجواج
واحد الولد قال لأمه: مي، محتاجك تمشي معايا غدا للمدرسة
قالت ليه أمه: علاش أولدي؟
قال ليها الولد: قال لينا الاستاد اليوما، اللي ما جاش داير التمارين غدا غادي نضرب مو
هادوا تلاتة ديال الصحاب تفارضو فدجاجة محمرة وشراوها
منين جاو ياكلوها مالقاوش الخبز، ناضو صيفطو واحد منهم يجيب ليهم الخبز
تسناوه ساعة ما جاش
تسناوه ساعتين ما جاش
تسناوه تلت سوايع ما جاش
طلع ليهم الدم، وقالوا صافي عيق، ملي يجي ياكل هو الخبز
وهو يخرج ليهوم من مورا الباب، وقال ليهم: شفتوا كون مشيت؟
هادا واحد معصب ما كيحملش يعاود الهدرة جوج مرات
مشى عند واحد الحانوت قال ليه: عندك الحليب؟
قال ليه مول الحانوت: لا
مشى المعصب عند حانوت اخر وقال ليه: و نتا؟
واحد التلميد دخل القسم معطل بلا ما يدق الباب
قال ليه الاستاد معصب: كوري؟؟
جاوبو التلميد: لا لا، مغربي
واحد دخل لدارو باغي غير يجبد الصداع مع مرتو
ما لقى منين يشدها، شاف حتى عيا وهو يقول ليها: فين الغبرة اللي كانت فوق الطبلة؟
قالت ليه: علاش اشنو بغيتيها؟
قال ليها: كنت كاتب عليها النمرة ديال صاحبي
واحد الغليض مشى عند الطبيب وقال ليه: بغيت ندير ريجيم، تقهرت بهاد الغلض
قال ليه الطبيب: كول نص خبزة ف الفطور، ونص خبزة ف الغدا، ونص خبزة ف العشا
قال ليه الغليض: واش قبل الماكلة أولا بعد منها؟
أستاذ ديال الإنجليزية قال لواحد التلميد: دير ليا
She has
في جملة مفيدة
قال ليه التلميذ : شي هاز اللحم وشي هاز الهم
هادي واحد المرا كبيرة وحشومية بزاف مشات تقرا ف محو الأمية
وكان العنوان ديال الدرس : دخل أحمد، خرج أحمد
ملي تقول المعلمة: دخل أحمد، كدير المرا الزيف على راسها
وملي تقول المعلمة: خرج أحمد، كتحيد المرا الزيف على راسها
ملي مشات للدار، قال ليها راجلها: آشنو قريتو اليوم؟
قالت ليه: علاه احمد خلانا نقراو؟ ها هو داخل، ها هو خارج
